कालीकोटका मनविर सुनारको सम्झना

हामी हाँसेकोमा

हामी नाँचेकोमा

हामी बाँचेकोमा

दुःखी छन् यी चोखा भनाउँदाहरु

र त

ओठबाट हाँसो खोस्छन्

पाउहरुमा नेल ठोक्छन्

जीउबाट प्राण थुत्छन् 

यी चोखा भनाउँदाहरु ।

यमराजका सन्तानहरु

आगो सल्काउँछन् हाम्रा जीउ भरी

हाँस्न भन्छन्, 

नाँच्न भन्छन्

बाँच्न भन्छन्

जब जलनले हामी तडपन्छौं

पेट मिचीमिची रमाउछन्,

यी चोखा भनाउँदाहरु ।

आँसुको संगीत सुनेर

रगतको मातमा झुमेर

आदेशहरु जारी गर्छन

यी चोखा भनाउँदाहरु, 

खबरदार ! 

"जिउमा आगो नसल्काई

तिमीहरु हाँस्न पाउँदैनौं,

सग्ला खुट्टाहरुमा

तिमीहरु नाँच्न पाउँदैनौ,

मुटु र स्वास चलाएर

तिमीहरु बाँच्न पाउँदैनौ,"

हामी इन्कार गर्छौै

मनुस्मृती आदेशहरु

चाणक्य कुटिल चालहरु

त्यसैले 

त्रशित छन यी चोखा भनाउँदाहरु

र त

ओठबाट हाँसो खोस्छन्

पाउहरुमा नेल ठोक्छन्

जीउबाट प्राण थुत्छन् 

यी चोखा भनाउँदाहरु